Nagpahayag ng suporta si millennial senatorial candidate Camille Villar sa lokal na industriya ng abaka kasunod ng kanyang pagbisita sa Catanduanes, ang abaca capital ng Pilipinas.
“Congratulations po sa pagiging ‘world’s top producer of abaca’, at dahil po dyan ay buhay na buhay ang inyong ekonomiya at kabuhayan,” pahayag ni Villar.
“Talagang proud po tayo sa industriya na yan dito sa inyong lalawigan dahil sa ang abaca ay tinatawag na ‘world’s strongest fiber’,” dagdag niya.
Ang Pilipinas ay nanatiling top producer ng abaka sa buong mundo at ginagamit pa ito ng mga world-renowed Filipino designer sa kanilang mga proyekto.
“Tuloy-tuloy nating palalakasin pa po ang sektor ng agrikultura, ang local trade and economy para mas lumikha pa ng madami pang trabaho at kabuhayan para sa ating mga kababayan,” sabi pa ni Villar.
Binanggit niya ang kahalagahan ng pagbibigay ng sapat na suporta sa mga abaca farmer at tiyaking nabebenta ito sa competitive prices.
Ang Catanduanes ay may 36,853 ektaryang abaca production areas na sinasaka ng 15,000 abacaleros, ayon sa Department of Agriculture.
Para matiyak na napapanatili ng Pilipinas ang kanilang posisyon bilang pangunahing abaca producer sa mundo, sinabi ni Villar na mabigyan ng karampatang suporta ang industriya ng abaka.
“I share the same vision with all of you. Itutuloy-tuloy po natin ang suporta sa probinsya ng Catanduanes at maging sa buong Bicol region,” ani Villar. (Dindo Matining)
